:
- لأنْ لاعلاقة لي بالقتل ، سأقتل ماليس لي به علاقة -
* * *
1 - [ غيمة الخاطر ]
حبيبي من هنا لين القصيد اللي يجيب رضاك
............ جعل حرفٍ مـَ فل حجاجك اوراقه تنحابه
أنا يوم الزعل ضمّك شربت احلى منابع ماك
......... وعطيتك طير عذري فدوتك صيده ومخلابه
يجيني مثل باكر من ورى غيب القدر لاماك
......... وادرهمله مجاهيم الغلا ترعى من اعشابه
حبيبي لك ورى هاك الرجم خل ٍ بغى يرقاك
......... تجوّد في مسابيق الوصال وضاقت اسبابه
تحيزم بالموده و انتهض يبغى طرف يمناك
......... شراك بغيمة الخاطر ولا .. بليت مرقابه
حبيبي يا عساها من يدينك .. تنتهي فرقاك
............ و تهنابك فياضٍ شيحها يشكيك لترابه
تروح ، ولا تروح الا عن العين وتجي في ذاك
......... خفوقٍ في هواك حسام ولا له عنك ياجرابه
من اول هالحلا ، لين الغلا ، لين الخلا يقراك
.......... ابكتبك بشعيبه و السدر والطلح و هضابه
أبكتب لين يقراك الزعل ويبوس راس رضاك
.......... و ابشعل لك سراج القاف لين تنام باهدابه
(مجلة بروز العدد السادس - يناير 2000 م)
* * *
2- [ اخت اللقى ]
لهاك الليال ام الوصال وللهنوف اخت اللقى
.................... لهاك الحرير اللي كسى وجه الجروح الذابله
لذاك الخضار اللي غشى نية غلاها وارتقى
.................... لذيك الدروب اللي من ايام الصبا متجاهله
عنّـتـْـلي الخطوه عقب ما ذاقت دروب الشقى
.................... مثل البحر لا ضاق موجه ماله الا ساحله
مثل المطر لا من رقى متن السحاب ولا اتقى
.................... ترجي هماليله عيون ٍ من ضماها قاحله
والجادل اللي بالحنايا طيفها هلّ وسقى
.................... ام الجفون ،ام الطعون ،ام العيون الكاحله
هبّ النفس من فمّها واستشعبت جرد النقى
.................... قالت هلا ، واستسلمت كل العزوم الصامله
بنت الرغد كنّ الذهب في جيدها حبل عتقى
.................... تركع على زمرده .. سود الليال الجادله
ممتدتٍ كنْ قدّها في ظلها شك و هقى
.................... شاف الردوف اللي تقل من بعضها متزاعله
مملوحة ٍ من ملحها قال البحر : لي وش بقى
.................... حلوة نبا ، اخت الضبا ، من كل عينٍ جافله
نوب ٍ تغيب و لا تجي و لا هي اللي تنلقى
................. مثل الدروب اللي مشت تحت الخطاوي الهامله
ونوب ٍ ليالي هالوصال اتجيبلي اخت اللقى
.................... هاك الحرير اللي كسى وجه الجروح الذابله
( مجلة بروز العدد الثالث 2000م)
* * *
3- [ عباس وأنا ]
شفت الطفل لا من بكى و نزل الراس ؟
......................... هذاك انا لا فارقـتـني عيونك
اشيل جرحي وازرعه داخلي ياس
......................... وتثمر قصايد نبتها من مزونك
يا طفلتي وان جيت ابي الليل مجلاس
........................ القى السما و نجومها يحترونك
شوفي عيون الليل لا ضمّ الانفاس
......................... يصير كله خصلة ٍ في متونك
منهو عطا لليل شمعات واجراس ؟
........................ منهو مخلي للقمر نفس لونك ؟
منهو فتح لليل شباك الاحساس ؟
....................... منهو عزم طيفك وسامر لحونك ؟
غيري انا والحب جينا لك اجناس
................... ان جيت جاك الحب وان رحت دونك
حبيبتي و الحب جفنين و نعاس
...................... لّلي توسد راحتك عن طعونك
وانا زبنت الجد الاقصى من الباس
..................... عشان اعيش بداخلك ما أخونك
شفتي انعزالي بالليالي عن الناس ؟
..................... اني اشوف الناس داخل جفونك
هذا أنا والحب و الطفل عباس
....................... نبكي و نعبس لا فقـدنا عيونك
(1999 م )
* * *
* * *
4- [ فُتَاتُ لَيْل ]
تَعرّي و ارْمي ثْيَاب الرّثِيْث القَاتِم الأسْمَل
............ تَمَادي بَالتّبرّج وَ السّفُوْر وْ لا تِجيْ سَهْلَه
أبِيْكي بِنْت ظِن وْ بِنْت جِن وْ بِنْتي الأجْمَل
........... أبِيكيْ مُوْمِس تْهِزّ الذنُوب وْ نِصْفهَا طِفْلَه
دَهاليْز التقَاليْد وْ عَتِيم التأْرَخَه تُهمَل
............ مَـابيْكي مِثل أمّك طيّبَه مِنْ طِيْبها خِبلَه !
أبيْكي بِنْت شَارع مِن تَسَكّع أرْصِفَه مَـتْمِل
......... أبيْكي تُغْري عْيوْن البِشَر بَارْدافِك الجَزْلَه
أبيْكي تْضَاجعيْ كِل الرّجال وْ هَالنِسا تحْمَل
............. أبي اوْلادِك كثيْر اكْثَر مِن اللي ضَاجَعك حِملَه
أبيْكي تْقبّلي كِل الشّفَاه وَ هَالبَشَر تُثمَل
.............. أبي نِصْفك فجُوْر وْ نِصْفك الثّاني طهُوْر ابْلَه
أبيْكي إخْتصَار الإثْم ابِي رحْماتِك الأشْمَل
.............. أبي جَنّة سَريْرك دَربَها دَمّ وْ أرَقْ عُزْلَه
كِذا ودّي تكوْني يَالْقصِيْده يَا آخِر الأجمَل
................ تَعالي مِن غمُوضك سَافِره بَس لا تِجي سَهْلَه
ليست هناك تعليقات:
إرسال تعليق